Për të gjashtën ditë radhazi, qytetarë të ndryshëm kanë organizuar protesta në bulevardin Dëshmorët e Kombit në Tiranë, duke shprehur kundërshtimin ndaj vendimmarrjeve të ekzekutivit. Pjesëmarrësit kërkojnë dorëheqjen e kryeministrit Edi Rama dhe rishikimin e një sërë nismash ligjore, të cilat sipas tyre cenojnë interesin publik dhe mjedisin.
Një ditë më parë, përfaqësuesit e Lëvizjes së Re Qytetare bënë publike pesë kërkesa, të cilat i konsiderojnë të panegociueshme:
- Dorëheqja e qeverisë.
- Shfuqizimi i statusit dhe kuadrit ligjor për investitorët strategjikë.
- Shfuqizimi i Paketës së Maleve.
- Anulimi i ndryshimeve në ligjin për Zonat e Mbrojtura.
- Anulimi i ndryshimeve në ligjin për trashëgiminë kulturore shqiptare.
Motivi kryesor i protestave lidhet me projektin turistik në zonën e mbrojtur të Zvërnecit, si dhe me atë që protestuesit e cilësojnë si rrezik për interesin kombëtar. Organizatorët theksuan se nisma udhëhiqet nga qytetarë të pavarur dhe se tubimet do të vijojnë derisa të merren përgjigjet e duhura nga institucionet përkatëse.
Përditësime
Organizatorët deklaruan se lëvizja drejtohet nga një grup koordinues i pavarur nga Partia Socialiste dhe Partia Demokratike. Protestuesit e cilësuan nismën si një qëndresë kundër 'klasës politike 35-vjeçare'. Pasi u mblodhën në sheshin 'Skënderbej', pjesëmarrësit marshuan drejt Kryeministrisë.