Në ditën e 23-të të tubimeve para Kryeministrisë, përfaqësuesit e lëvizjes qytetare artikuluan zyrtarisht platformën e kërkesave të tyre. Dritan Goxhaj, në emër të grupit koordinues, deklaroi se këto kërkesa janë përpiluar pas konsultimeve të kryera përgjatë tri javëve të qëndresës.
Kërkesat e prezantuara nga organizatorët përfshijnë:
• Dorëheqjen e panegociueshme të kryeministrit Edi Rama dhe kabinetit qeveritar.
• Krijimin e një qeverie teknike tranzitore, jopartiake, me një mandat 12-mujor.
• Ndryshime kushtetuese për barazinë para ligjit, të miratuara me referendum popullor, që përfshijnë ndryshimin e Kodit Zgjedhor, ndryshimin e ligjit për financimin e partive politike dhe kufizimin e mandatit të kryeministrit në jo më shumë se dy mandate gjatë gjithë jetës politike.
• Mosheqjen dorë nga kërkesat ekonomike dhe mjedisore, duke kërkuar anulimin e ndryshimeve në ligjin për Zonat e Mbrojtura dhe Trashëgiminë Kulturore, shfuqizimin e Paketës së Maleve dhe të kuadrit ligjor për Investimet Strategjike.
• Hartimin e një kontrate të re sociale mes qytetarëve dhe shtetit, përmes konsultimeve me intelektualë dhe ekspertë.
Organizatorët theksuan se këto kërkesa janë të panegociueshme dhe shprehën vendosmërinë për të vazhduar tubimet paqësore deri në plotësimin e tyre.