Në kryeqytet ka nisur dita e 26-të e protestës qytetare. Protestuesit u grumbulluan fillimisht në sheshin “Skënderbej”, për të vazhduar më pas marshimin përgjatë bulevardit “Dëshmorët e Kombit” dhe për t’u stacionuar para godinës së Kryeministrisë, ku po mbahen fjalimet.
Gjatë tubimit, qytetarët kanë përsëritur pesë kërkesat e tyre drejtuar pushtetit:
• Dorëheqja e panegociueshme e Kryeministrit dhe e qeverisë.
• Krijimi i një qeverie teknike tranzitore, jopartiake, me mandat 12-mujor.
• Ndryshime kushtetuese për barazinë para ligjit dhe miratimin e tyre përmes referendumit popullor, duke përfshirë ndryshimin e Kodit Zgjedhor, të ligjit për financimin e partive politike dhe kufizimin e mandateve të Kryeministrit në jo më shumë se dy mandate gjatë gjithë jetës politike.
• Anulimi i ndryshimeve në ligjin për “Zonat e Mbrojtura” dhe “Trashëgiminë Kulturore”, shfuqizimi i “Paketës së Maleve” dhe i statusit për “Investimet Strategjike”.
• Hartimi i një kontrate të re sociale përmes konsultimeve me intelektualë, ekspertë teknikë dhe qytetarë apartiakë.
Krahas kërkesave të listuara, disa pjesëmarrës kanë propozuar që protestat të shtrihen edhe gjatë orëve të paradites. Ky propozim mbetet ende i pakonfirmuar zyrtarisht nga grupet e protestuesve.
Përditësime
Protesta qytetare në Tiranë ka hyrë sot në ditën e 27-të, duke shënuar zhvillime të reja organizative. Grupi koordinues shpalli përbërjen prej 13 anëtarësh dhe i drejtoi një letër zyrtare misioneve diplomatike perëndimore në vend. Gjatë tubimit, protestuesit kërkuan anulimin e zgjedhjeve të ardhshme, kritikuan figurat politike Ramush Haradinaj e Ali Ahmeti, dhe përkujtuan 82-vjetorin e gjenocidit ndaj shqiptarëve të Çamërisë.