Gjatë tubimit të zhvilluar më 24 qershor 2026, përfaqësues të protestës kanë rilexuar kërkesat kryesore, të cilat përfshijnë dorëheqjen e menjëhershme të kryeministrit Edi Rama dhe të qeverisë, si dhe krijimin e një qeverie teknike me mandat 12-mujor.
Protestuesit kërkuan ndryshime rrënjësore kushtetuese dhe ligjore përmes referendumit, duke përfshirë:
- Reformimin e plotë të Kodit Zgjedhor;
- Rregulla më të rrepta për financimin e partive politike;
- Kufizimin e mandatit të kryeministrit në maksimum dy mandate;
- Hartimin e një kontrate të re sociale mes qeverisë dhe qytetarëve.
Gjithashtu, u kërkua anulimi i ligjeve që sipas protestuesve dëmtojnë interesin publik:
- Ligji për Zonat e Mbrojtura;
- Ligji për Trashëgiminë Kulturore;
- E ashtuquajtura “Paketa e Maleve”;
- Ligji për Statusin e Investitorëve Strategjikë.
Organizatorët theksuan se nëse qeveria vazhdon të injorojë kërkesat, lëvizja do të përshkallëzohet deri në bllokimin e institucioneve kryesore në mbarë vendin. Pavarësisht reshjeve të dendura, qytetarët vazhduan qëndrimin në çadrat e ngritura pranë godinës qeveritare, ndërsa forcat e Policisë së Shtetit monitoruan situatën nga brenda ambienteve të Kryeministrisë.
Përditësime
Pas përfundimit të fjalimeve para Kryeministrisë, protestuesit kanë nisur një marshim nëpër rrugët e Tiranës. Grupet organizatore kanë zgjeruar listën e kërkesave, duke kërkuar dorëheqjen e kryeministrit Edi Rama dhe largimin e të gjithë klasës politike aktuale.