Në seancën plenare të zhvilluar më 3 shkurt 2026 në Kuvend, Partia Socialiste tërhoqi nga rendi i ditës projektvendimin për ndryshimet në përbërjen e Komisionit të Reformës Territoriale.
Lajmin e bëri të ditur nga foltorja kreu i grupit parlamentar të PS-së, Taulant Balla. Ai deklaroi se mazhoranca ka vendosur heqjen e këtij pike nga rendi i ditës, pa dhënë detaje të mëtejshme mbi arsyet e kësaj lëvizjeje. "E heqim nga rendi i ditës ndryshimet në Komisionin e Reformës Territoriale! Do vijojë puna në Komisionin e Posaçëm të Reformës Territoriale.", u shpreh Balla.
Vendimi mori reagime nga opozita. Deputeti i Partisë Demokratike, Luçiano Boçi, kërkoi që mazhoranca të tërhiqet plotësisht nga ndryshimet e propozuara, jo vetëm të heqë pikën nga rendi i ditës. "Duhet të tërhiqeni nga ndryshimet në Komisionin e Reformës Territoriale, jo thjesht ta hiqni nga rendi i ditës! Tërheqja tregon vullnetin, shtyrja nuk tregon asgjë.", u shpreh Boçi, duke theksuar se opozita e konsideron këtë proces të njëanshëm.