Prokuroria Speciale e Republikës së Kosovës (PSRK) ka shprehur qëndrimin e saj zyrtar lidhur me disa vendime të fundit të shpallura nga Gjykata Themelore në Prishtinë. Institucioni ka mirëpritur aktgjykimin fajësues ndaj të pandehurit Shaqir Lutvija, i cili është dënuar për krime lufte. Sipas PSRK-së, ky vendim është rezultat i provave konkrete të paraqitura gjatë procesit gjyqësor, duke theksuar se aktgjykimi ka një rëndësi të veçantë për forcimin e sundimit të ligjit dhe rritjen e besimit të publikut në sistemin e drejtësisë.
Lidhur me aktgjykimet liruese në rastin “Drenica 1”, ku të përfshirë janë Sami Lushtaku, I.H., Rr.Rr., F.M., R.Xh., S.T. dhe Sh.J., si dhe në rastin e 13 të akuzuarve për një sërë veprash penale, PSRK ka bërë të ditur se do të ndërmarrë hapat e nevojshëm ligjorë pasi të pranojë aktgjykimet e plota. Prokuroria do të vlerësojë mundësinë e ushtrimit të ankesës në gjykatën e shkallës së dytë, brenda afateve të përcaktuara me ligj.
Çështja e dytë përfshin 13 persona të akuzuar për:
• Krijimin e skemave piramidale;
• Organizimin e bixhozit të paligjshëm;
• Kontrabandën me mallra;
• Shmangien e detyrimeve tatimore;
• Shpëlarjen e parave.
Në deklaratën e saj, Prokuroria Speciale ritheksoi se i ushtron funksionet e saj në mënyrë të pavarur, në përputhje me Kushtetutën dhe legjislacionin në fuqi, me qëllim mbrojtjen e interesit publik dhe konsolidimin e shtetit të së drejtës në Kosovë.