Muaji qershor i vitit 2026 solli anomali të theksuara termike në nivel global dhe kontinental. Të dhënat e publikuara nga Shërbimi i Ndryshimeve Klimatike Copernicus dhe Komisioni Europian tregojnë se Shqipëria përjetoi temperatura dukshëm më të larta se mesatarja gjatë periudhës 18–30 qershor, ku vlerat tejkaluan normalen me 2 deri në 4°C. Kjo anomali ishte më e theksuar në pjesën veriore dhe qendrore të Ballkanit.
Ndikimi në nivel global dhe europian
Në shkallë botërore, temperatura mesatare arriti në 16.54°C, duke u renditur si i dyti më i nxehti i regjistruar ndonjëherë, me një rritje prej 0.56°C mbi mesataren e periudhës 1991–2020 dhe 1.39°C mbi nivelin paraindustrial (1850–1900).
Situata më kritike u shënua në Europën Perëndimore, ku gjatë gjysmës së dytë të muajit, vendet si Franca dhe Gjermania përjetuan temperatura mesatare deri në 9°C mbi normalen klimatike. Mesatarja e rajonit për qershorin ishte 20.74°C, shifër që tejkaloi rekordin e vendosur në qershor të vitit 2025.
Sipas hartave klimatike, pjesa më e madhe e Europës u përball me rritje të temperaturave, me përjashtim të Qipros dhe Maltës, të cilat raportuan vlera afër normales. Në Spanjë dhe Portugali, devijimi termik u regjistrua në shkallën 3–6°C mbi mesataren.