Qeveria miratoi më 15 janar 2026 procedurat e hollësishme për kalimin e pronësisë së truallit shtetëror nën ndërtesa të zëna nga mijëra familje dhe biznese. Agjencia Shtetërore e Kadastrës (ASHK) do të udhëheqë procesin, ndërsa aplikimi kryhet plotësisht nëpërmjet portalit e-Albania.
Kategoritë që përfitojnë
Procesi përfshin ndërtesat e privatizuara nga shteti, ndërmarrjet shtetërore ose ish-kooperativat bujqësore, si dhe objektet e ndërtuara me leje nga bashkitë pas datës 10 gusht 1991, ku toka ka mbetur pronësi shtetërore. Pronësia e truallit mund të fitohet edhe kur ndërtesa ka pësuar dëmtime strukturore, për sa kohë që figuron në regjistrat kadastralë.
Dokumentet e nevojshme
Subjektet duhet të dorëzojnë në format PDF:
- Kontratën e privatizimit ose lejen e ndërtimit bashkë me Genplanin;
- Vërtetimin e regjistrimit të ndërtesës, nëse ekziston;
- Vërtetimin për pagesën e taksës së truallit në përdorim nga viti 2010 e tutje.
Kostoja dhe uljet
Për ndërtesat banimi, kalimi i pronësisë bëhet falas për sipërfaqen e përcaktuar në dokumentacionin e privatizimit. Për ndërtesat me funksion biznesi ose social-ekonomik, pagesa kryhet vetëm për pjesën e shfrytëzuar ekonomikisht, me çmimin e tregut sipas Hartës së Vlerës së Tokës.
Ata që kanë kërkuar privatizimin para korrikut 2012 dhe e paguajnë brenda 30 ditëve nga njoftimi përfitojnë ulje 20%.
Afatet dhe procedurat
ASHK ka 60 ditë për verifikimet në terren dhe hartimin e aktit të evidentimit pas dorëzimit të kërkesës. Pas llogaritjes së vlerës, aplikanti ka sërish 60 ditë për pagesën. Nëse tarifat kadastrale nuk paguhen, vendoset hipotekë ligjore mbi pasurinë deri në shlyerje.