Këshilli i Ministrave ka miratuar një vendim që përcakton krijimin e rezervës së armatimeve dhe pajisjeve teknologjike për Forcat e Armatosura të Republikës së Shqipërisë. Akti rregullon detyrimet e subjekteve të licencuara që operojnë në industrinë e mbrojtjes për të garantuar gatishmërinë ushtarake në rast lufte ose kërcënimesh konkrete ndaj vendit dhe aleatëve strategjikë.
Sipas vendimit, detyrimet janë si më poshtë:
• Prodhuesit e armatimeve do të mbajnë rezerva deri në 5 % të kapacitetit vjetor të prodhimit.
• Subjektet tregtare do të ruajnë 5 % të inventarit të tyre për tregtim.
• Shoqëria shtetërore KAYO është ngarkuar me një rezervë prej 25 % të kapacitetit të saj vjetor, nivel që mund të ndryshohet nga Komiteti i Mbrojtjes dhe Sigurisë.
Aktivizimi i këtyre rezervave do të kryhet me propozim të shefit të Shtabit të Përgjithshëm të Forcave të Armatosura dhe me urdhër të ministrit të Mbrojtjes. Pas njoftimit nga Agjencia e Industrisë së Mbrojtjes, subjektet kanë detyrimin ligjor t'i japin përparësi vënies në dispozicion të këtyre pajisjeve, duke anashkaluar detyrimet e tjera kontraktore.
Vendimi përcakton standarde të rrepta për ruajtjen e rezervave, duke kërkuar ambiente të certifikuara, sisteme sigurie dhe monitorimi 24 orë në ditë, si dhe mirëmbajtjen periodike të pajisjeve.