Këshilli i Ministrave miratoi të mërkurën vendimin që përcakton kriteret e vlerësimit, afatet, procedurën e konkurrimit dhe metodologjinë e pikëzimit për dhënien e licencave për bastet sportive online, në përputhje me ligjin "Për lojërat e fatit në Republikën e Shqipërisë".
Vendimi hyn në fuqi pas botimit në Fletoren Zyrtare dhe ngarkon Ministrinë e Financave, Autoritetin e Mbikëqyrjes së Lojërave të Fatit (AMLF) si dhe Komisionin e Licensave për zbatimin e tij.
Kriteret e vlerësimit
Dokumentacioni i aplikantëve vlerësohet me pikë sipas këtyre kritereve, me peshën maksimale:
- Oferta ekonomike, vlera e ofruar mbi tarifën e licencimit: 30 pikë;
- Përvoja në fushën e lojërave të fatit: 30 pikë;
- Plani i biznesit për aktivitetin e basteve online: 5 pikë;
- Kapacitetet organizative dhe administrative: 20 pikë;
- Kapacitetet për zgjidhjet software-ike, modelet e licencave dhe certifikimet ndërkombëtare: 15 pikë.
Pikët totale maksimale janë 100. Aplikantët renditen në rend zbritës sipas pikëve. Në rast barazie pikësh, renditja përcaktohet me short, ku data dhe ora njoftohen paraprakisht nga Komisioni i Licensave.
Procedura dhe kushtet
Thirrja për konkurrim publikohet në faqen zyrtare të AMLF-së, në dy gazeta ndërkombëtare dhe në Buletinin e Njoftimeve Publike. Afati për dorëzimin e aplikimeve është 45 ditë kalendarike.
Të drejtë aplikimi kanë vetëm personat juridikë të regjistruar si shoqëri aksionare. Çdo subjekt paguan tarifë aplikimi prej 500.000 lekë, e pakthyeshme.
Sipas një burimi, numri i licencave do të jetë i kufizuar në jo më shumë se 10 në të gjithë vendin, ndërsa Komisioni i Licensave vendos për hapjen e procedurës dhe numrin e licencave.
Në rast ankese, Ministri i Financave ka kompetencën të krijojë një komision ad hoc për shqyrtimin e tyre.