Këshilli i Ministrave ka miratuar vendimin për rikthimin e përfaqësisë diplomatike shqiptare në kryeqytetin e Irlandës, Dublin. Ky veprim vjen si pjesë e strategjisë për zgjerimin e rrjetit diplomatik të Shqipërisë.
Sipas dokumentit zyrtar, nisma u propozua nga Ministria për Evropën dhe Punët e Jashtme. Vendimi bazohet në nenin 100 të Kushtetutës dhe dispozitat e ligjit nr. 24/2026, "Për shërbimin e jashtëm të Republikës së Shqipërisë".
Financimi për hapjen dhe funksionimin e misionit do të sigurohet nga buxheti i vitit 2026, përmes programit "Mbështetje diplomatike jashtë shtetit" dhe zërit të shpenzimeve korrente të kësaj ministrie. Ministria për Evropën dhe Punët e Jashtme është institucioni përgjegjës për zbatimin e këtij akti, i cili pritet të hyjë në fuqi menjëherë pas publikimit në "Fletoren zyrtare".