Qeveria shqiptare synon që deri në vitin 2030 rreth 20% e rrjetit rrugor të përfshihet në skema tarifimi elektronik. Kjo parashihet në strategjinë sektoriale të transportit dhe planin e veprimit deri në atë vit.
Dokumenti vendos në fokus zgjerimin e Sistemeve Inteligjente të Transportit (SIT) në të gjithë rrjetin TEN-T. Këto sisteme përfshijnë menaxhimin në kohë reale të trafikut, monitorimin e aseteve dhe ofrimin e informacionit për udhëtarët. Një komponent kryesor është zhvillimi i biletimit digjital në transportin ndërqytetar dhe sistemeve të qëndrueshme të tarifimit elektronik (e-tolling).
Strategjia parashikon përgatitjen e kuadrit ligjor dhe teknik për tarifimin digjital të rrugëve, në përputhje me standardet europiane si Direktiva Eurovignette dhe Shërbimi Europian Elektronik i Tarifimit Rrugor (EETS). Pilotimi i e-tolling do të nisë në segmentet me trafik më të lartë të rrjetit TEN-T, pas ngritjes së infrastrukturës përkatëse.
Qeveria parashikon krijimin e një fondi të dedikuar për mirëmbajtjen e rrugëve, i financuar nga tarifat e përdoruesve, përfshirë pagesat rruge dhe tarifat e karikimit të mjeteve elektrike. Ky fond respekton parimet e Direktivës Eurovignette dhe Rregullores (BE) 2023/1804 mbi instalimin e infrastrukturës së lëndëve djegëse alternative.
Aktualisht, segmente si Rruga e Kombit, aksi Thumanë–Kashar dhe tuneli i Llogarasë përfshihen në skema pagesash, për të cilin të fundit pritet aplikimi i tarifës brenda sezonit veror.
Përveç tarifimit rrugor, strategjia synon zbatimin e biletimit digjital në transportin ndërqytetar të udhëtarëve për të rritur integrimin e shërbimeve dhe transparencën në arkëtime.
PPP dhe koncesionet mbeten në fokus, ndërsa qeveria vazhdon qasjen pro tyre.