Qendra Klinike Universitare e Kosovës (QKUK) ka njoftuar se, në përputhje me Udhëzimin Administrativ në fuqi, përcjellësit e pacientëve në Klinikën e Pediatrisë dhe Klinikën e Kirurgjisë së Fëmijëve janë të liruar nga tarifa 3 euro për natë gjatë qëndrimit në klinikat e QKUK-së.
Njoftimi specifikon se nga kjo tarifë përjashtohen gjithashtu përcjellësit e pacientëve të Klinikës së Onkologjisë dhe të gjitha klinikave ku trajtohen pacientë me sëmundje malinje, pavarësisht nëse pacientët janë të shtruar në klinika të tjera brenda QKUK-së.
Po ashtu, nga pagesa përjashtohen të gjithë përcjellësit e pacientëve nën moshën 18 vjeç, si dhe pacientët me sëmundje kronike.
QKUK sqaron se në Klinikën e Pediatrisë dhe në Klinikën e Kirurgjisë së Fëmijëve përcjellësit nuk kanë paguar asnjëherë tarifën prej 3 euro për natë.
Ndërkohë, Koalicioni i OJQ-ve për Mbrojtjen e Fëmijëve (KOMF) ka shprehur shqetësim në lidhje me vendosjen e pagesës ditore për prindërit ose kujdestarët ligjorë të fëmijëve mbi 15 vjeç në klinikat e QKUK-së dhe spitalet e përgjithshme. KOMF vlerëson se ky vendim bie në kundërshtim me dispozitat ligjore në fuqi në Republikën e Kosovës dhe konventat ndërkombëtare.