Gjykata Supreme e Kosovës ka shfuqizuar pjesërisht Udhëzimin Administrativ nr.03/2024 të Ministrisë së Shëndetësisë për bashkëpagesat në shërbimet shëndetësore. Vendimi u mor më 13 maj 2026, pas padisë së paraqitur nga Instituti i Kosovës për Drejtësi (IKD) kundër kësaj ministrie.
Gjykata ka shpallur të paligjshme dhe ka shfuqizuar pikën 4 të shtojcës 3 dhe pikën 5 të shtojcës 4 të udhëzimit. Këto dispozita përcaktonin pagesë prej 3 euro për çdo ditë qëndrimi në spital për personin shoqërues të pacientit mbi moshën 15 vjeç.
IKD-ja argumentoi se Ligji nr.04/L-125 për Shëndetësi e definon bashkëpagesën si mjet financiar që paguhet nga personat që shfrytëzojnë shërbimet shëndetësore. Personi shoqërues nuk konsiderohet shfrytëzues, pasi nuk i nënshtrohet trajtimit mjekësor dhe nuk përfiton shërbime diagnostike, terapeutike apo rehabilituese.
Pas shqyrtimit të provave dhe dispozitave kushtetuese e ligjore, Gjykata Supreme vlerësoi se dispozitat e kontestuara nuk kanë bazë të mjaftueshme ligjore. Ato zgjeruan në mënyrë të palejuar nocionin e bashkëpagesës, e cila mund të vendoset vetëm ndaj përfituesve të drejtpërdrejtë të shërbimeve shëndetësore.
Gjykata theksoi se prania e shoqëruesit lidhet me mbështetjen e pacientit dhe jo me marrjen e shërbimeve mjekësore. Po ashtu, konstaton se Ministria e Shëndetësisë ka tejkaluar autorizimet ligjore, duke krijuar një detyrim financiar të ri pa bazë të qartë ligjore, në kundërshtim me parimin e legalitetit.
Vendimi mund të ndikojë në qasjen e qytetarëve në kujdesin shëndetësor, duke hequr tarifën për shoqëruesit në institucione si QKUK.