Qendra Spitalore Universitare “Nënë Tereza” (QSUT) ka larguar nga faqja e saj zyrtare listën me pajisje mjekësore që kërkoheshin në formë donacioni. Lista, e cila kishte qëndruar e publikuar për disa muaj, përfshinte pajisje si:
• Respiratorë;
• Laringoskopë;
• Defibrilatorë;
• Monitorë pacienti për matje invasive;
• Elektrobisturi;
• Shiringa elektrike.
Largimi i këtij dokumenti erdhi pas reagimeve të shumta në rrjetet sociale. Nënkryetari i Komisionit për Shëndetësinë, Eduart Shalsi, sqaroi se publikimi i nevojave është një procedurë e rregullt dhe e detyrueshme me ligj, e cila synon garantimin e transparencës dhe administrimin e përgjegjshëm të pasurisë publike.
Sipas Shalsit, identifikimi i nevojave kryhet përmes Drejtorisë së Inxhinierisë Klinike dhe njoftimi ishte aktiv që prej muajit shkurt. Ai nënvizoi se aktualisht të gjitha pajisjet e listuara janë plotësuar përmes procedurave të prokurimit ose donacioneve të përfituara. “Nëse dikush ofron donacion, pajisja hiqet nga lista e prokurimit. Kjo është një platformë që mund ta diskutojmë për ta përmirësuar”, deklaroi ai.
Nga ana tjetër, QSUT reagoi duke sqaruar se publikimi i këtyre të dhënave bëhet në zbatim të ligjit “Për të Drejtën e Informimit” dhe programit të transparencës institucionale. Institucioni nënvizoi se ky proces nuk krijon përparësi për përfitimin e donacioneve, por siguron një administrim të dokumentuar dhe transparent të kërkesave të shërbimeve spitalore.