Pas tensioneve të ditëve të fundit, qumështorja Vita ka njoftuar rifillimin e grumbullimit të qumështit të freskët nga fermerët. Ky vendim është arritur pas një takimi 3-orësh ndërmjet ministrit të Bujqësisë, Pylltarisë dhe Zhvillimit Rural, prodhuesve të qumështit, përfaqësuesve të qumështores dhe Shoqatës së Fermerëve.
Anëtari i Bordit të Shoqatës së Fermerëve, Fidan Krasniqi, konfirmoi se të gjitha palët janë pajtuar që të priten rezultatet zyrtare nga Agjencia e Ushqimit dhe Veterinarisë (AUV). Ai sqaroi se vonesa në publikimin e rezultateve është teknike, pasi mostrat nuk janë marrë vetëm në qumështoren Vita, por edhe në disa përpunues të tjerë, për të siguruar saktësinë e analizave.
Palët e përfshira u zotuan se AUV do t'i bëjë publike të gjeturat sa më shpejt të jetë e mundur. Marrëveshja e përkohshme mundëson vazhdimin e aktivitetit për fermerët, ndërsa çështjet e tjera të hapura pritet të diskutohen në takimet e radhës ndërmjet institucioneve dhe përfaqësuesve të industrisë së qumështit.