Deputeti dhe kandidati për deputet i LDK-së, Anton Quni, reagoi lidhur me parregullsitë e raportuara në procesin e numërimit të votave në Qendrën e Numërimit në Prizren.
Sipas të dhënave të KQZ-së të përditësuara në orën 12:20, pas rinumërimit numri i votave të tij u ul me 479 vota.
Në një deklaratë publike në Facebook, Quni theksoi se çdo rritje e votave në emrin e tij është bërë pa dashjen dhe pa dijeninë e tij. Ai deklaroi se nuk ka kërkuar, inkurajuar apo asistuar në devijimin e vullnetit të qytetarëve. Kjo ngritje artificiale, sipas tij, nuk përfaqëson mbështetjen reale dhe parimet e tij njerëzore.
Quni e cilësoi operacionin si kriminal, që i ka njollosur personalitetin dhe karrierën politike. Përfshirja e emrit të tij në skema manipuluese e ka goditur dinjitetin dhe besueshmërinë e ndërtuar me vite para elektoratit. Ai ngriti pyetje mbi motivin e manipulimit, pse u zgjodh emri i tij dhe kush janë urdhërdhënësit e ekzekutorët në Qendrën e Numërimit.
Deputeti i LDK-së kërkoi ndjesë publike nga kolegët kandidatë, votat e të cilëve mund të jenë tjetërsuar në favor të tij. Ai theksoi se garimi duhet të jetë i drejtë dhe çdo votë t’i takojë kandidatit me meritë.
Quni deklaroi se është i gatshëm të bashkëpunojë plotësisht me Policinë, Prokurorinë dhe organet e tjera të drejtësisë për zbardhjen e plotë të rastit. E vërteta, sipas tij, është mbrojtja e vetme.