Gjatë takimit të kreut të Partisë Demokratike, Sali Berishës, me demokratët në Kamëz, një qytetar adresoi shqetësimin për shtrenjtimin e biletës së transportit urban. Ai theksoi se banorët angazhohen politikisht pa mbështetje financiare, ndërsa paguajnë tarifa më të larta.
Qytetari deklaroi: "Deputetët të jenë pak më të ashpër atje në parlament o doktor. Mos të na lënë vetëm ne që të çohen demokratët. Ne po angazhohemi pa rrogë, pa lek, paguajmë edhe biletat e urbanit, megjithëse na e kanë ngritur këtu çmimin e biletës. [...] Tani u miratua nga anëtarë të këshillit bashkiak, votuan edhe demokratë. [...] Me datën 10 do vijmë, do marrim pjesë. Do përleshemi".
Vendimi i Bashkisë Kamëz
Ky shqetësim lidhet me vendimin e Bashkisë Kamëz për rritjen e biletës nga 40 në 50 lekë dhe të abonesë mujore nga 1200 në 1400 lekë. Vendimi u miratua nga Këshilli Bashkiak disa muaj më parë dhe u shoqërua me akuza për konflikt interesi.
Hetimi i Autoritetit të Konkurrencës
Autoriteti i Konkurrencës ka nisur hetim paraprak pas ankesave publike dhe reagimeve në media. Hetimi analizon funksionimin e konkurrencës në tregun e transportit urban në Kamëz, duke u përqendruar në linjat Kamëz–Tiranë–Kamëz dhe Paskuqan–Babrru–Tiranë. Operator i vetëm i licencuar është shoqëria "Shpresa-AL" SHPK, e cila mban pozicion dominues.
Autoriteti vlerëson se mungon analiza ekonomike e plotë për të justifikuar rritjen e tarifave bazuar në kosto reale. Hetimi mbulon periudhën 1 janar – 12 dhjetor 2025 dhe synon të verifikojë shkelje të ligjit "Për mbrojtjen e konkurrencës".
Dyshimet për konflikt interesi
Dyshimet lidhen me Dashnor Memaj, kryetar i Shoqatës së Transportit Urban dhe drejtues në "Shpresa-AL", përfituese direkte nga vendimi. Disa anëtarë të Këshillit Bashkiak që votuan pro kanë lidhje me kompaninë, ndërsa mbledhja ku u miratua vendimi u fshi më pas nga transkripti.