Ish-trajneri i njohur, Rafael Benitez, ka ndarë mendimin e tij mbi përpjekjen e Real Madridit për të transferuar sulmuesin argjentinas Julian Alvarez. Sipas raportimeve, klubi madrilen ofroi 150 milionë euro, shifër e cila u refuzua menjëherë nga drejtuesit e Atletico Madridit.
Refuzimi i ofertës bazohet në klauzolën e lirimit të futbollistit, e cila kap vlerën e 500 milionë eurove. Benitez e cilësoi lëvizjen si të papritur, duke marrë parasysh se më parë ishin përfolur emra të tjerë për vijën e sulmit të Real Madridit.
“Më erdhi si surprizë, sepse nuk e prisja, sidomos duke pasur parasysh se po përmendeshin emra të tjerë”, deklaroi Benitez. “Ai është pa dyshim një futbollist i shkëlqyer, por problemi është se çmimin nuk e përcakton ti, por tregu”.
Duke analizuar dinamikën e tregut aktual, Benitez solli si shembull historik transferimin e Fernando Torres te Liverpooli për 20 milionë funte (rreth 30 milionë euro), që në atë periudhë përbënte rekord për klubin anglez. Ai shtoi se, ndonëse 150 milionë euro mund të duken shumë, ato janë pjesë e realitetit të ri të tregut të futbollit.