Një pjesë e fazës së sipërme të raketës Falcon 9, e lëshuar nga SpaceX në janar të vitit 2025, pritet të përplaset me sipërfaqen e Hënës. Llogaritjet e kryera nga astronomi Bill Gray i Projektit Pluto, përmes programit Guide, tregojnë se përplasja do të ndodhë më 5 gusht.
Çështja është diskutuar nga ekspertët e Institutit Virtual të Kërkimeve për Eksplorimin e Sistemit Diellor (SSERVI) pranë NASA-s. Sipas vëzhguesit hënor Brian Day, Hëna është një mjedis dinamik ku përplasjet e këtij lloji janë pjesë e proceseve natyrore.
Lidhur me mundësinë e vëzhgimit të këtij eventi nga Toka, ekspertët mbeten skeptikë. William Cooke, menaxher në NASA, deklaroi se ndonëse reja e pluhurit që mund të krijohet nga goditja në skajin e diskut hënor mund të ndriçohet nga Dielli, gjasat për ta vëzhguar përplasjen janë shumë të ulëta. Faza e sipërme e raketës peshon rreth 4 tonë dhe aktualisht vazhdon lëvizjen e saj drejt trupit qiellor me shpejtësi më të madhe se 2 kilometra për sekondë.
Përditësime
Një grup prej 23 astronomësh ka konfirmuar se pjesa e sipërme e një rakete SpaceX do të përplaset me Hënën në orën 08:35, pranë kraterit Einstein. Raketa, e cila kishte për mision transportimin e moduleve Blue Ghost (të kompanisë Firefly) dhe Resilience (të ispace), dështoi të rikthehej në atmosferën e Tokës dhe mbeti në një orbitë të lartë. Ky përfundim është publikuar në një studim preprint.