Kryeministri Edi Rama reagoi lidhur me debatet për projektin e investimit në zonën e Zvërnecit. Gjatë sezonit të gjashtë të podkastit të tij, “Flasim”, ai bëri të ditur se ka zhvilluar një takim me banorët e kësaj zone, duke theksuar se ata përfaqësojnë interesin e drejtpërdrejtë mbi territorin në fjalë.
Rama nënvizoi se banorët kanë diskutuar për çështje që lidhen me regjistrimin e pronave dhe adresimin e pretendimeve ligjore. Sipas tij, nuk ka pasur kërkesa për ndalimin e investimit strategjik, ndërsa shtoi se qëndrimi i banorëve ka qenë pozitiv në lidhje me idenë e zhvillimit të zonës.
Kreu i qeverisë kritikoi reagimet në rrjetet sociale, të cilat i cilësoi si "spekulime" dhe "manipulime", duke shtuar se takimi me banorët e vërtetë të zonës vlen më shumë se çdo "ulërimë" apo zhurmë online. Sipas tij, banorët e pranishëm në takim janë ata që jetojnë, punojnë dhe kanë interesa ekonomike në atë territor.
Sipas kryeministrit, procesi do të vijojë në përputhje me procedurat institucionale dhe ligjore, duke e vënë theksin te rëndësia e këtij investimi për zhvillimin ekonomik të Vlorës dhe të gjithë Shqipërisë.
Përditësime
Kryeministri Edi Rama ka hedhur poshtë pretendimet se banorët e pranishëm në takimin e Zvërnecit ishin mbledhur me detyrim nga zonat e Nartës apo Vlorës. Në një reagim publik, Rama i cilësoi kritikët në rrjetet sociale si 'flamingot online', duke nënvizuar se biseda me banorët u zhvillua në një klimë konstruktive, në distancë nga gjuha konfliktuale e debatit digjital. Sipas kryeministrit, banorët e pranishëm nuk kanë shfaqur asnjë kundërshti ndaj projektit të investimit në zonë.