Një vlerësim për kërcënim i Bashkimit Evropian, të cilin e ka parë Radio Evropa e Lirë, paralajmëron se terrorizmi dhe ekstremizmi i dhunshëm paraqesin kërcënim të madh për BE-në. Vlerësimi përmend rreziqet e rritura nga Afganistani dhe Irani, si dhe efektet negative që dalin nga lufta në Ukrainë.
Niveli i kërcënimit në BE mbetet i lartë, me terrorizmin islamist që vazhdon të jetë shqetësimi më i madh. Ky vlerësim përputhet me një vlerësim të EUROPOL-it që në mars e përshkroi kërcënimin nga terrorizmi si akut. Dokumenti prej 23 faqesh, i përgatitur nga Këshilli i BE-së, mbulon zhvillimet dhe trendët kryesisht nga viti 2025.
Vlerësimi paralajmëron se përshkallëzimi në Iran ka rritur shqetësime shtesë, përfshirë mundësinë e aktivizimit të rrjetit të bashkëpunëtorëve apo celulave të fjetura për të kryer sulme hakmarrëse terroriste brenda Evropës, veçanërisht në shtete me popullsi të madhe hebraike dhe komunitete myslimane.
Në Afganistan, Shteti Islamik-Korasan konsiderohet një prej kërcënimeve kryesore të jashtme ndaj kontinentit. Grupi vazhdon të jetë aktiv përmes përhapjes së propagandës online, duke shënjestruar veçanërisht të rinjtë.
Një prirje e re alarmuese që theksohet është rekrutimi i të miturve, madje edhe të moshës 12-vjeçare, veçanërisht në platforma online si Telegram dhe TikTok. Si përgjigje, një nga rekomandimet është që BE-ja t’u kërkojë këtyre platformave të ngadalësojnë amplifikimin algoritmik.
Dokumenti shpreh gjithashtu shqetësim për mundësinë që ish-luftëtarë rusë të hyjnë në BE dhe të përfshihen në aktivitete kriminale ose akte të tjera dhune. Në Evropë këtë vit janë regjistruar disa sulme të konfirmuara terroriste, përfshirë therjen e dy burrave hebrenj në Londër, për të cilën mori përgjegjësinë grupi islamist proiranian Harakat Ashab Al-Yamin Al-Islamia.