Enti Shtetëror i Revizionit (ESHR) ka publikuar raportin për punën e Komisionit për Mbrojtjen e Konkurrencës (KMK) gjatë vitit 2024, duke shprehur mendim të kualifikuar mbi pasqyrat financiare dhe përputhshmërinë ligjore të institucionit. Gjetjet kryesore evidentojnë mangësi në menaxhimin financiar, administrimin e pasurisë dhe mungesën e një sistemi të unifikuar për ndjekjen e lëndëve dhe gjobave të shqiptuara.
Sipas raportit, institucioni nuk kishte siguruar ndërtesën, pajisjet dhe arkën, duke krijuar rreziqe për humbje materiale. Revizorët kontrolluan katër procedura të prokurimit publik me vlerë totale prej 1.18 milionë denarësh, duke konstatuar parregullsi në dy prej tyre. Në rastin e blerjes së tre telefonave celularë, specifikimet teknike ishin hartuar në mënyrë që të orientonin drejt një prodhuesi specifik, ndërsa në një kontratë për shërbime taksi mungonte metodologjia e qartë për ndarjen e pikëve. Një tjetër çështje e ngritur ishte mungesa e listave të evidencës ditore për vitin 2024, të cilat nuk u vunë në dispozicion të revizorëve. Gjatë procesit të auditimit, u kryen gjithashtu rregullime kontabël në vlerën 13.1 milionë denarë për pasqyrimin e vlerës së ndërtesës në bilanc.
Në një reagim zyrtar, Komisioni për Mbrojtjen e Konkurrencës deklaroi se këto gjetje i referohen punës së përbërjes së mëparshme, e cila për pjesën më të madhe të vitit 2024 ka funksionuar me një numër më të vogël anëtarësh se sa parashikohet me ligj. Institucioni theksoi se përbërja aktuale ka hasur sfida të konsiderueshme, përfshirë lëndë të prapambetura që datonin që nga viti 2017.
Sipas të dhënave të KMK-së, gjatë vitit 2024 janë miratuar 3 vendime për gjoba në vlerë prej 1.968.100 denarësh, ndërsa në vitin 2025 janë miratuar 31 vendime me vlerë totale prej 56.206.321 denarësh, çka shënon një rritje të ndjeshme në efikasitet. Institucioni bëri të ditur se është duke zbatuar rekomandimet e dhëna nga revizioni për forcimin e kapaciteteve dhe përmirësimin e kontrollit të brendshëm, progres i cili është njohur edhe nga Komisioni Evropian në kuadër të Agjendës së Reformave.