Pas përfundimit të procesit të intervistimit, Komisioni për Transferim dhe Avancim të Prokurorëve të Shtetit ka rekomanduar Këshillit Prokurorial të Kosovës (KPK) avancimin e dy prokurorëve në pozitën e prokurorit në Zyrën e Kryeprokurorit të Shtetit. Kandidatët e përzgjedhur janë Veton Shabani, aktualisht prokuror në Prokurorinë Themelore në Ferizaj, dhe Ersan Qavolli, prokuror në Prokurorinë Themelore në Pejë. Të dy kandidatët ushtrojnë detyrën në Departamentet për Krime të Rënda në prokuroritë përkatëse.
Procesi i intervistimit është zhvilluar më 7 shtator 2026, nën mbikëqyrjen e komisionit të përbërë nga Zejnullah Gashi (kryesues), si dhe anëtarët Elza Bajrami-Kastrati dhe Visar Krasniqi. Gjatë vlerësimit, çdo anëtar i komisionit ka parashtruar nga tri pyetje për kandidatët, në përputhje me Rregulloren për transferim dhe avancim. Sipas rezultateve zyrtare, Veton Shabani ka arritur 88.6 pikë, ndërsa Ersan Qavolli ka marrë 85 pikë.
Procesi është monitoruar nga Instituti i Kosovës për Drejtësi, pas ftesës së dërguar nga komisioni përkatës. Përveç anëtarëve të përmendur, komisioni ka në përbërje edhe anëtarët rezervë: Arlinda Muqa, Milot Krasniqi dhe Bahri Hyseni.