Sistemi arsimor parauniversitar në Shqipëri po përballet me një tkurrje të shpejtë të numrit të nxënësve. Të dhënat zyrtare nga INSTAT tregojnë se brenda një viti akademik, numri i nxënësve në arsimin 9-vjeçar dhe të mesëm ka rënë me 10,020 persona, ose 3%.
Numri total i të regjistruarve ka zbritur nga 349,827 nxënës në vitin akademik 2023-2024 në 339,807 nxënës në vitin 2024-2025. Duke marrë parasysh mesataren prej 25 nxënës për klasë, kjo rënie ka sjellë mbylljen e rreth 400 klasave gjatë vitit shkollor.
Goditja më e rëndë është regjistruar në arsimin fillor, ku numri i nxënësve ka rënë me 4,710 fëmijë, duke zbritur në 136,379. Në ciklin e lartë të arsimit bazë, rënia është 2,745 nxënës, me total 114,238. Në arsimin e mesëm, gjimnazet dhe shkollat profesionale kanë humbur 2,565 nxënës.
Ekspertët e fushës e shohin këtë trend si një kambanë alarmi që do të ndikojë gradualisht universitetet dhe tregun e punës. Emigrimi i familjeve të reja dhe rënia e lindshmërisë renditen si shkaqet kryesore të këtij fenomeni.