Reshjet e dendura të shiut kanë shkaktuar probleme të ndjeshme në infrastrukturën rurale të Bashkisë Has, duke sjellë pasoja të menjëhershme në terren. Sipas verifikimeve të kryera nga Drejtoria e Mbrojtjes Civile pranë Bashkisë Has, situata më problematike është konstatuar në Njësinë Administrative Golaj, ku rreth 80% e segmenteve rrugore rezultojnë të dëmtuara. Vërshimi i ujërave ka prekur veçanërisht fshatrat Golaj, Nikoliq, Kosturr dhe Helshan.
Drejtoresha e Mbrojtjes Civile të Bashkisë Has, Arbërie Rada, konfirmoi se përveç dëmeve në rrugë, reshjet kanë shkaktuar dëmtimin e një banese. Në lidhje me furnizimin me energji elektrike, autoritetet njoftuan se zona mbulohet rregullisht, ndërkohë që u është bërë thirrje banorëve të njoftojnë Emergjencat Civile për çdo problematikë të re.
Ndërkohë, infrastruktura e rrugëve nacionale në qarkun e Kukësit vijon të jetë funksionale. Pavarësisht reshjeve, qarkullimi i automjeteve nuk është ndërprerë. Në disa segmente është raportuar për rënie gurësh, të cilat janë pastruar nga kompanitë mirëmbajtëse të angazhuara në terren për monitorimin e situatës. Autoritetet u kanë bërë apel drejtuesve të mjeteve të tregojnë kujdes të shtuar gjatë lëvizjes për shkak të kushteve të vështira atmosferike dhe mjegullës që ka përfshirë zonën.