Punimet në segmentin rrugor pranë Xhamisë së Llapit në kryeqytet kanë rifilluar pas një ndërprerjeje të shkaktuar nga protestat e qytetarëve. Banorët dhe pronarët e bizneseve përreth kishin bllokuar kantierin duke vendosur makineri të rënda, si shenjë kundërshtimi ndaj planit të Komunës së Prishtinës për rikonfigurimin e rrugës.
Sipas qytetarëve, projekti i drejtuar nga kryetari Përparim Rama parashikon ngushtimin e rrugës nga katër korsi në tri, ku një korsi do të shërbejë për hyrjen nga drejtimi i qytetit të Podujevës, ndërsa dy të tjera për daljen nga Prishtina. Banorët shprehën shqetësimin se ky ndryshim do të shkaktojë falimentimin e bizneseve, për shkak të vështirësive që do të krijohen për furnizimin e lokaleve të tyre. Ata pretenduan gjithashtu se vendimi është marrë në mënyrë të njëanshme dhe pa një planifikim të konsultuar më parë.
Në lidhje me këto zhvillime, banorët raportuan se kishin dorëzuar një peticion me rreth 150 nënshkrime pranë institucionit të komunës, duke kërkuar një takim me kryetarin Rama, kërkesë e cila sipas tyre nuk u realizua.
Situata u zhbllokua pas një diskutimi mes përfaqësuesve të banorëve dhe drejtorit të kompanisë që po kryen punimet, në prani të Policisë së Kosovës. Pas dakordimit mes palëve, punimet rifilluan, ndërsa banorët shprehën shpresën që projekti të përfundojë brenda afateve të parashikuara.