Artane Rizvanolli, ministre e Ekonomisë së Republikës së Kosovës, përmbylli vizitën zyrtare në Uashington me takime në Departamentin e Energjisë dhe Departamentin e Shtetit të Shteteve të Bashkuara.
Në takimin me Tommy Joyce, ndihmëssekretar në detyrë për Zyrën e Çështjeve Ndërkombëtare në Departamentin e Energjisë, u diskutuan mundësitë e bashkëpunimit ndërqeveritar dhe me kompani amerikane. Temë e rëndësishme ishte teknologjia e gazifikimit të thëngjillit, ku SHBA ka përvojë të dëshmuar. Ministrja Rizvanolli shprehu përkrahje për përpjekjet e SHBA për pavarësimin e Evropës nga gazi rus. Ajo theksoi se, edhe pse Kosova nuk ka infrastrukturë gazi, zhvillimet rajonale dhe evropiane ndikojnë te çmimet e importit, prandaj siguria energjetike evropiane rrit sigurinë edhe për Kosovën.
Në takimin me Daniel Lawton, zëvendësndihmëssekretar në Byronë për Çështje Evropiane dhe Euroaziatike në Departamentin e Shtetit, u vlerësua bashkëpunimi ndërmjet dy vendeve, i bazuar në parime dhe vlera të përbashkëta. Palët diskutuan thellimin e bashkëpunimit në sektorë strategjikë si energjia dhe minierat.
Ministrja Rizvanolli falënderoi për përkrahjen e deritanishme, duke përmendur vendimin e administratës së presidentit Trump për vazhdimin e Programit Kompakt të Korporatës së Sfidave të Mijëvjëçarit (MCC) për Kosovën. Ajo theksoi se Qeveria e Kosovës do të ketë përqendrim të veçantë në këtë mandat për avancimin e këtyre projekteve.