Artane Rizvanolli, ministre e Ekonomisë së Republikës së Kosovës, priti më 23 mars 2026 një delegacion të lartë të Grupit të Bankës Botërore. Takimi u zhvillua në Prishtinë dhe u përqendrua në bashkëpunimin e deritanishëm si dhe planet për thellimin e partneritetit në fushat prioritare të qeverisë, me fokus të veçantë në sektorët e energjisë dhe minierave.
Delegacionin e kryesoi Xiaoqing Yu, drejtoreshë e Divizionit për Ballkanin Perëndimor në Bankën Botërore, me pjesëmarrjen e Wiebke Schloemer, drejtoreshë e IFC-së për Evropën dhe Azinë Qendrore, si dhe Marcelo Castellanos, menaxher i lartë i vendit i IFC-së për Evropën Juglindore.
Palët vlerësuan lart bashkëpunimin ndërmjet institucioneve kosovare dhe Grupit të Bankës Botërore, duke theksuar mbështetjen e vazhdueshme profesionale dhe teknike ndër vite. Sipas deklaratave gjatë takimit, ky bashkëpunim ka qenë i qëndrueshëm dhe ka dhënë rezultate konkrete në zhvillimin e sektorëve strategjikë.
U shpreh gatishmëri për vazhdimin e partneritetit në fusha ku ka pasur sukses, si:
- ankandet e energjisë së ripërtëritshme;
- zhvillimi i kornizës rregullative;
- rritja e efiçiencës së energjisë.
Ministrja Rizvanolli e cilësoi Grupin e Bankës Botërore si partner strategjik për Kosovën. Ajo theksoi rolin e tij në mbështetjen e reformave, avancimin e kapaciteteve institucionale dhe zhvillimin e projekteve që rrisin sigurinë energjetike dhe nxisin rritjen e qëndrueshme ekonomike.
Në takim u vlerësua se modelet e zhvilluara në Kosovë për efiçiencën e energjisë, përfshirë Fondin e Kosovës për Eficiencë të Energjisë, po shihen me interes në nivel rajonal si shembuj të suksesshëm.
Delegacioni i Bankës Botërore rikonfirmoi përkushtimin për të vazhduar mbështetjen ndaj Kosovës, në përputhje me prioritetet qeveritare dhe objektivat e përbashkëta për zhvillim të qëndrueshëm.