Territori i qarkut të Lezhës ka përjetuar reshje shiu me intensitet të ulët dhe dëborë në lartësi mbi 700 metra, të cilat tani janë ndërprerë. Megjithatë, pasojat e përmbytjeve dhe rrëshqitjeve të tokës vazhdojnë të ndikojnë në disa zona, duke kërkuar monitorim të vazhdueshëm nga strukturat e Emergjencave Civile.
Situata në Mirditë
Vazhdimi i gërryerjes së tokës bujqësore në zonën Zall-Donaj nga Lumi Fan i Vogël ka rrëzuar rreth orës 00:00 shtyllat elektrike të transformatorit, të cilat ishin spostuar një ditë më parë nga OSHEE. Kjo ka lënë pa energji elektrike fshatrat Ndërfanë, Gëziq, Kalanjan dhe Cekaj. Avancimi i gërryerjes po drejtohet drejt rrugës së fshatit dhe banesave përreth, duke rrezikuar sigurinë. Bashkia ka kërkuar mbështetje urgjente nga Ministria e Bujqësisë përmes mjeteve të DRUK Lezhë, sipas një kërkese të datës 9 janar 2026, ku AKMC është vënë në dijeni.
Një problem tjetër është tubacioni i zbuluar i linjës së ujësjellësit të qytetit të Rrëshenit në fshatin Jezull, ku gërryerjet e përroit rrezikojnë këputjen e tij dhe shembjen e aksit rrugor që lidh fshatra të ndryshme. Verifikimet e fundit nga Emergjencat Civile kanë konstatuar rrëshqitje toke në disa fshatra, të cilat paraqesin rrezik për banesa dhe prona private.
Situata në Kurbin
Gjendja në terren është përmirësuar në zonat e prekura. Në njësinë Fush Kuqe, në fshatrat Adriatik, ka vazhduar evadimi i ujërave me ulje të nivelit të tyre. Gjatë ditës së djeshme, probleme janë regjistruar në fshatin Patog, kryesisht në lokale dhe biznese për shkak të baticave detare. Grupet e punës do të vazhdojnë verifikimin e dëmeve, veçanërisht në fshatin Adriatik pas tërheqjes së ujërave. Punimet përfshijnë sistemimin dhe pastrimin e rrugicave të lagjeve, largimin e inerteve dhe aluvioneve të sjella nga prurjet, si dhe forcimin e KUL-së gjatë gjithë gjatësisë në njësinë Mamurras. Mjetet e punës mbeten të njëjta, përveç eskavatorit të FA-së, i tërhequr pas përfundimit të punës në segmentin Skuraj-Vinjollë. Fenomeni i rrëshqitjes së tokës mbetet problematik në zonat kodrinore dhe malore.
Situata në Lezhë
Situata paraqitet e qetë. Do të vijojë monitorimi i gjithë territorit për problematika të mundshme. Grupet e punës do të evidentojnë dhe vlerësojnë dëmet nga përmbytjet, do të pastrojnë inertet dhe mbeturinat. Me pesë kamionë, dy ekskavatorë, punonjës dhe fouristrada të DRUK, me mbështetjen e Policisë Bashkiake, vazhdon puna për përforcimin e argjinaturës së lumit Drin në fshatin Ishull Shëngjin. Furnizimi me ujë të pijshëm vazhdon normalisht, ndërsa energjia elektrike ka ndërprerje në zonat problematike. Niveli i lumit Drin ka rënë në parametra normalë, po ashtu edhe lumi Mat pas reduktimit të shkarkimeve nga H/C Shkopet e Qafë Mollë. Akset rrugore nuk paraqesin pengesa deri tani.