Në qarkun e Vlorës janë punësuar rreth 1000 shtetas indianë gjatë pesë viteve të fundit, sipas të dhënave të siguruar. Këta punëtorë zënë kryesisht pozicione në sektorët e manifakturës, hotelierisë-turizmit dhe ndërtimit.
Punëtorët indianë arrijnë në Vlorë çdo vit për të plotësuar nevojën për fuqi punëtore, të krijuar nga emigracioni i shqiptarëve. Ata punësohen me kontrata dyvjeçare, ku përfshihet akomodimi dhe ushqimi. Disa prej tyre kanë shprehur kënaqësi me kushtet e punës, pagën dhe mikpritjen lokale.
Një punëtor i quajtur Abdulahim, i mbërritur kohët e fundit në Shqipëri, punon në një fabrikë këpucësh. Ai deklaroi: "Vlora duket një qytet i mirë dhe jam i lumtur. Kam një kontratë dhe do të punoj këtu për dy vite. Këtu paguhem mirë. Puna është shumë e mirë. Më pëlqejnë njerëzit në Vlorë. Ushqimi dhe akomodimi për ne janë falas."
Nasbullashan, nga Kalkuta – qyteti i Nënë Terezës –, punon gjithashtu në prodhimin e këpucëve. Ai theksoi se rroga përkthehet në rreth 35 mijë rupi indianë, shifër e mjaftueshme për standardet e atij vendi. Qyteti u pëlqen shumë punëtorëve të rinj.
Një punëtor tjetër, po ashtu i sapombërritur nga India, konfirmoi se kushtet e punës dhe paga janë të kënaqshme.