Ditëve të fundit në Kosovë janë regjistruar vrasje të njëpasnjëshme. Katër persona kanë humbër jetën nga armët e zjarrit në Gjakovë, Klinë dhe Podujevë.
Ish-koloneli i policisë Refki Morina foli për këto ngjarje në emisionin "Ora Shtatë" të Klan Kosova. Ai theksoi se ato ndikohen nga një varg faktorësh në aspektin psikologjik, pedagogjik dhe të sigurisë.
Morina shpjegoi se dhuna dhe vrasjet vijnë për shkak të akumulimit të vazhdueshëm të problemeve në familje dhe shoqëri. Sipas tij, fokusi i tërësishëm duhet të jetë në stabilizimin e situatës sociale, ekonomike dhe politike.
Ai deklaroi se çdo i gjashti ose i shtati banor mban armë zjarri ilegale. "Në 1.8 milionë banorë, çdo i 6/7 banor ka një armë ilegale, prandaj duhet të ndërmerren veprime konkrete", tha Morina.