Në shënim të Ditës Ndërkombëtare Kundër Abuzimit me Droga dhe Trafikimit të Paligjshëm, Koalicioni i OJQ-ve për Mbrojtjen e Fëmijëve (KOMF) dhe qendra për këshillim Labyrinth kanë ngritur alarmin për përkeqësimin e situatës së abuzimit me substanca narkotike. Sipas të dhënave, numri i përgjithshëm i përdoruesve në Kosovë ka tejkaluar shifrën 35 000.
Sipas gjetjeve të Labyrinth, marihuana mbetet lënda narkotike më e përdorur. Megjithatë, vërehet një rritje e shpejtë e përdorimit të kokainës në popullatën e përgjithshme, ndërsa një rritje e lehtë e konsumit të heroinës është identifikuar kryesisht te komunitetet Rom, Ashkali dhe Egjiptian.
Ekspertët theksojnë se mosha mesatare e fillimit të përdorimit ka rënë nga 18 vjeç në vitin 2018, në 16 vjeç në periudhën e fundit. Faktorët kryesorë që çojnë të miturit drejt këtij fenomeni përfshijnë:
- Disponueshmërinë e lehtë të drogave në treg;
- Traumat e fëmijërisë;
- Mungesën e informacionit mbi rreziqet;
- Presionin shoqëror dhe kuriozitetin.
Organizatat theksojnë se institucionet e Kosovës nuk po sigurojnë shërbime të mjaftueshme për parandalimin dhe rehabilitimin e viktimave. Në reagimin e tyre thuhet se vendi ka mungesë të programeve të strukturuara dhe ekipeve mobile në komunitet, të cilat do të mundësonin identifikimin e hershëm dhe testimin e rasteve të përdorimit të drogave te të rinjtë.