Federata e Futbollit e Kosovës (FFK), në bashkëpunim me sponsorin zyrtar të Superligës, Albi Mall, ka ndarë çmimin tradicional "Ylli i Javës" për javën e 21-të të këtij edicioni. Ky çmim i është dhënë futbollistit të FC Ferizaj, Ruben Silva Richards, i cili shënoi dy gola në ndeshjen e fituar 2:1 kundër FC Ballkanit, duke sjellë tri pikë për skuadrën e tij.
Vlerësimin e ka bërë Komisioni i Veteranëve të Futbollit. Ndeshja u luajt të dielën në shtëpi, ku 22-vjeçari Richards realizoi të dy golat për Ferizajin.
Pas marrjes së çmimit, Richards u shpreh i lumtur dhe falënderoi bashkëlojtarët. Ai deklaroi për faqen zyrtare të FFK-së: «Mendoj që ka qenë një ndeshje e mirë, një ndeshje normale ku ekipi funksionoi mirë mes vete. Unë shënova dy gola, por pa përpjekjen e madhe të futbollistëve të tjerë nuk do të ishte e mundur, andaj jam shumë mirënjohës. Është një ligë shumë e mirë, me lojtarë taktikë, me kualitet shumë të mirë dhe qyteti e shteti i Kosovës janë shumë të mira. Bashkëlojtarët më kanë pritur shumë mirë dhe gjithçka është shumë bukur këtu».
Ai theksoi se ia dedikon shpërblimin kapitenit të ndeshjes, Mexhit Neziri, duke thënë: «I kam shënuar dy gola, por gjithashtu janë futbollistët e tjerë në ekip të cilët po kalonin javë të vështira dhe mendoj personalisht që është një tjetër futbollist që ka bërë shumë mirë në këtë ndeshje; ai është kapiteni i ndeshjes, Mexhit Neziri, të cilit ia dedikoj këtë shpërblim».