Ditën e hënë, në Qendrën Spitalore Universitare “Nënë Tereza” (QSUT), u prezantua Rudina Degjoni si drejtoresha e re e institucionit. Në ceremoninë e prezantimit ishte e pranishme ministrja e Shëndetësisë dhe Mbrojtjes Sociale, Evis Sala.
Rudina Degjoni zëvendëson në këtë detyrë Anxhela Paparizon, e cila u lirua nga detyra. Paparizo e kishte mbajtur këtë post prej 23 shtatorit 2025, periudhë gjatë së cilës drejtoi proceset administrative dhe strategjike të institucionit, me fokus në përmirësimin e shërbimeve spitalore, modernizimin e infrastrukturës dhe forcimin e standardeve të kujdesit ndaj pacientit.
Drejtuesja e re, Rudina Degjoni, sjell një përvojë të gjerë në administrimin publik dhe spitalor. Sipas të dhënave të publikuara nga Ministria e Shëndetësisë dhe Mbrojtjes Sociale, karriera e saj përfshin pozicionet e mëposhtme:
• Drejtore Ekzekutive (CEO) e Spitalit Memorial Fier (2021-2026)
• Drejtore e Përgjithshme e Fondit të Sigurimit të Detyrueshëm të Kujdesit Shëndetësor (FSDKSH) (2019-2020)
• Drejtore e Agjencisë Rajonale të Kujdesit Shëndetësor (shkurt–maj 2019)
• Këshilltare e Brendshme e Drejtorit të Përgjithshëm, FSDKSH (2012-2019)
• Përvojë profesionale në institucione shëndetësore në Athinë dhe Tiranë.
Sipas njoftimit zyrtar, synimi i këtij ndryshimi është forcimi i kapaciteteve menaxheriale dhe rritja e cilësisë së shërbimeve shëndetësore për qytetarët.