Në Qendrën Spitalore Universitare Nënë Tereza (QSUT) është hapur gara për përzgjedhjen e drejtuesve të 9 shërbimeve spitalore të rëndësishme.
Gara nisi më 10 shkurt dhe synon zëvendësimin e shefave aktualë, të cilët kanë mbushur moshën e pensionit. Ndër shërbimet e përfshira janë anestezi-reanimacioni, neurologjia, onkologjia dhe dermatologjia.
Kandidatët duhet të plotësojnë kushte strikte: titull profesor ose doktoraturë të mbrojtur në universitete të BE-së, ShBA-së, Kanadasë, Turqisë ose Japonisë. Gjithashtu, nevojitet përvojë akademike si pedagog me kohë të plotë jo më pak se 5 vjet, si dhe përvojë klinike diagnostike jo më pak se 10 vjet në specialitetin përkatës.
Përveç CV-së, kandidatët garojnë me një platformë strategjike katërvjeçare, që paraqet vizionin e tyre për drejtimin e shërbimit. Kandidatët kanë dorëzuar tashmë dosjet e tyre.
Komisioni i vlerësimit po shqyrton dosjet për të shpallur më pas emrat e drejtuesve të rinj. Një pjesë e tyre kanë qenë të komanduar deri tani në këto pozita dhe janë pjesë e garës.