Në një intervistë për emisionin “Dosje” me moderatorin Ermal Panduri, veprimtarja Saime Isufi foli për marrëdhëniet mes Kadri Zekës dhe vëllezërve Gërvalla, duke theksuar se bashkëpunimi i tyre ishte më i ngushtë se sa ai vëllazëror. Ajo shpjegoi se bashkimi i organizatave ilegale shqiptare u formalizua pikërisht në natën e 17 janarit 1982, datë kur ndodhi vrasja e tyre në Gjermani.
Saime Isufi tregoi se për veprimtarinë e Jusuf Gërvallës ishte njohur fillimisht gjatë kohës së studimeve në Prishtinë, ndërsa më vonë kishte parë nga afër angazhimin e tij në Zvicër. Ajo theksoi se ata kishin marrë pjesë së bashku në aktivitete për 28 Nëntorin në Gjermani, ku Kadri Zeka dhe Jusuf Gërvalla kishin mbajtur fjalime për bashkatdhetarët.
Sipas Isufit, pas demonstratave të pranverës së vitit 1981, u shfaq nevoja për një platformë të përbashkët veprimi. Dokumenti me tezat e “Frontit Popullor për Republikën e Kosovës”, hartuar në maj të vitit 1981, ishte përpiluar nga Komiteti Drejtues i Organizatës Marksiste-Leniniste të Kosovës (OMLK), ku bënin pjesë Kadri Zeka dhe Mehmet Hajrizi. Ky dokument u dërgua më pas në Zvicër për të shërbyer si bazë për bashkimin e organizatave.
Isufi vlerësoi se Kadri Zeka kishte një rol kryesor në organizimin e demonstratave të vitit 1981, ku gjithsej u zhvilluan dhjetë të tilla në Evropë për të mbështetur kërkesat e shqiptarëve në Kosovë. Ajo pohoi se bashkëpunimi praktik mes Kadri Zekës dhe vëllezërve Gërvalla kishte qenë i konsoliduar dhe se bashkimi i organizatave kishte mbetur vetëm të formalizohej me shkrim.