Kryeministri i Kosovës, Albin Kurti, ka kujtuar demonstratat e 11 marsit 1981 në një postim në Facebook. Ai thekson se studentët e Universitetit të Prishtinës u ngritën në një demonstratë masive, e cila hapi një periudhë të re për shqiptarët nën Jugosllavi.
Sipas Kurtit, protesta kishte nisur një javë më parë, më 4 mars, kundër kushteve të këqija në mensën e universitetit, por u ngrit shpejt në nivel artikulimesh politike. Më 11 mars, e mërkurë si sot 45 vjet më parë, mijëra njerëz nga e gjithë Kosova iu përgjigjën thirrjes së studentëve. Organizatorët dhe artikuluesit e kërkesave ishin kryesisht aktivistë të organizatave të fshehta politike.
Kërkesat përmbledheshin rreth parullës "Kosova Republikë", shkurt "KR", që synonte ta bënte Kosovën republikën e shtatë në Federatën Jugosllave. Demonstrata e 11 marsit u pasua nga ato gjithëpopullore më 26 mars, si dhe më 1 dhe 2 prill 1981. Këto ngjarje morën emrin Pranvera '81, si stinë e kryengritjes politike dhe rizgjimit kombëtar të shqiptarëve.
Kurti vlerëson demonstratat e 1981-s si ngjarje kyçe në historinë politike të Kosovës. Ato shprehën indinjatën qytetare dhe revoltën e shqiptarëve, të cilët nën Jugosllavi ishin të shtypur politikisht, të nënpërfaqësuar, të diskriminuar etnikisht dhe të shfrytëzuar ekonomikisht.
Demonstratat u shtypën dhunshëm nga policia jugosllave, me mijëra arrestime, ndalime arbitrare, gjyqe politike dhe dënime me burg.