Sindikata e Bashkuar e Arsimit, Shkencës dhe Kulturës (SBASHK) ka reaguar me shqetësim të thellë kundër ligjëratës së organizuar në Gjimnazin "Xhevdet Doda" në Prishtinë. Aktiviteti u mbajt nga përfaqësues të Gjykatës Speciale në bashkëpunim me organizatën Nisma e të Rinjve për të Drejtat e Njeriut në Kosovë (YIHR).
SBASHK e konsideron të papranueshme që institucionet arsimore të përdoren për të promovuar një narrativë të njëanshme, që synon të bindë nxënësit se Gjykata Speciale përfaqëson drejtësi. Sipas sindikatës, padrejtësia më e madhe është paraburgimi për më shumë se pesë vjet i ish-krerëve të Ushtrisë Çlirimtare të Kosovës (UÇK), të cilët SBASHK i quan luftëtarë të lirisë dhe bashkëpunëtorë të NATO-s në përpjekjet për liri, dinjitet dhe të drejtë arsimore.
Sindikata rikujton se gjatë represionit serb në Kosovë, Serbia kishte mbyllur të gjitha shkollat shqipe, përfshirë Gjimnazin "Xhevdet Doda". Në atë periudhë, mësimdhënësit dhe punëtorët e arsimit, të organizuar edhe përmes SBASHK-ut, kishin mbajtur gjallë arsimin shqip me sakrifica të mëdha.
SBASHK e cilëson paradoksale dhe moralisht të papranueshme promovimin në të njëjtat ambiente shkollore të një gjykate që, sipas tyre, gjykon në mënyrë të njëanshme luftën çlirimtare të popullit të Kosovës, duke barazuar viktimën me agresorin. Sindikata kritikon gjithashtu përfshirjen e YIHR-së, duke e akuzuar se ka futur një agjendë politike dhe ideologjike në institucionet arsimore, pa respektuar ndjeshmëritë historike, kombëtare dhe arsimore.
SBASHK u bën thirrje Ministrisë së Arsimit, Drejtorisë Komunale të Arsimit në Prishtinë dhe menaxhmentit të Gjimnazit "Xhevdet Doda" të marrin masa konkrete për të parandaluar shndërrimin e shkollave në hapësira për promovimin e mekanizmave që cenojnë të vërtetën historike dhe dinjitetin e luftës çlirimtare. Sindikata riafirmon përkrahjen për vlerat e UÇK-së dhe ish-drejtuesit e saj në Hagë, duke theksuar se lufta për arsim, liri dhe dinjitet nuk gjykohet.