Erion Veliaj, kryebashkiak i Tiranës, ndodhet në paraburgim që prej 10 shkurtit 2025 dhe akuzohet për përfshirje në disa raste korrupsioni, pastrim parash dhe mosdeklarim pasurie.
Gjatë seancës paraprake në Gjykatën e Posaçme, kjo u shty për 2 shkurt, për shkak të mosnjohjes së tij me aktet e dosjes.
Avokati i Veliaj-it, Artan Gjermeni, deklaroi se klienti ka të drejtë të njihet personalisht me aktet, qoftë me dokumente të printuara apo elektronike. Ai shpjegoi se Drejtoria e Përgjithshme e Burgjeve nuk e mundëson këtë pa urdhër nga organi i procedurës. “Erion Veliaj atje ka qenë, atje është sot. Nuk ka mekanizëm tjetër”, u shpreh Gjermeni.
Gjykata fillimisht vendosi mbylljen e shqyrtimit gjyqësor, duke e konsideruar mungesën e deklarimeve si mungesë vullneti nga mbrojtja. Pas pretendimeve të ngritura nga vetë Veliaj, vendimi u revokua. Gjykata autorizoi avokaten Valentina Teodoresku për të takuar të paraburgosurin në IEVP Durrës.
Pas këtij takimi, procedimi do të vazhdojë në datën e caktuar. Gjermeni theksoi se kjo garanton një të drejtë procedurale bazë.