Gjatë një operacioni të përbashkët në portin e Hamburgut, policia dhe dogana gjermane kanë sekuestruar një sasi rekord prej 1.5 tonë metamfetamine, e njohur ndryshe si Crystal Meth. Lënda narkotike ishte fshehur brenda një kontejneri, i cili sipas dokumenteve të transportit duhej të përmbante mijëra thasë me oriz të bardhë të importuar nga Pakistani.
Zbulimi erdhi pas vëzhgimit të disa kontejnerëve nga hetuesit. Gjatë një kontrolli rutinë me rreze X, njëri prej tyre ngriti dyshime, çka çoi në kontrollin e imtësishëm të ngarkesës. Autoritetet gjetën një substancë kristalore që në pamje të parë ngjante me orizin, e cila pas testeve laboratorike dhe analizave toksikologjike u konfirmua si metamfetaminë.
Vlera e tregut të drogës së sekuestruar është përllogaritur në rreth 28.5 milionë euro. Sipas prokurorisë, hetimet janë ende në vijim për të zbardhur autorët e këtij trafiku dhe destinacionin përfundimtar të ngarkesës. Aktualisht, nuk ka të dhëna se droga ishte destinuar për tregun vendas të Hamburgut. Operacioni u krye nga grupi i përbashkët hetimor kundër narkotikëve, i përbërë nga efektivë të Zyrës së Policisë Kriminale të Landit dhe Zyrës së Hetimeve Doganore.