Në pikën kufitare të Bërnjakut, autoritetet e Doganës së Kosovës në bashkëpunim me Policinë e Kosovës, kanë parandaluar tentativën për hyrjen e mjeteve monetare të padeklaruara në territorin e Republikës së Kosovës. Rasti ka ndodhur mbrëmjen e 7 tetorit, rreth orës 22:15, gjatë kontrolleve të rregullta rutinore.
Sipas informacioneve, një automjet i markës Renault Kangoo me targa të huaja, i drejtuar nga shtetasi Vitomir Bjelić, është përzgjedhur për një kontroll më të detajuar pas hyrjes në territorin e vendit. Ndonëse gjatë intervistimit drejtuesi ka deklaruar se nuk posedonte mallra apo mjete monetare për të deklaruar, dyshimet e zyrtarëve doganorë çuan në një kontroll fizik të automjetit.
Gjatë kontrollit të detajuar, në një hapësirë të fshehtë në dyshemenë e automjetit, të mbuluar me tepih, u gjet një qese e zezë që përmbante sasi parash. Autoritetet konfirmuan se shuma totale e gjetur kap vlerën e 30,550 eurove. Sipas të dhënave, 30,000 euro ishin të fshehura në hapësirën e dyshemesë, ndërsa 550 euro të tjera u gjetën në portofolin e drejtuesit.
Dogana e Kosovës ka rikujtuar se, në përputhje me Ligjin Nr. 05/L-096 për Parandalimin e Pastrimit të Parave dhe Luftimin e Financimit të Terrorizmit, çdo udhëtar që kalon kufirin me mjete monetare në vlerë prej 10,000 euro ose më shumë, është ligjërisht i obliguar të bëjë deklarimin me shkrim te zyrtari doganor, si dhe të paraqesë burimin e këtyre mjeteve.