Sekuestrohen tri automjete luksoze në Vlorë nga Policia

Strukturat për Hetimin e Krimeve në Drejtorinë Vendore të Policisë Vlorë kanë ndërmarrë një plan masash të përqendruar te verifikimi i automjeteve me vlera të larta financiare. Gjatë kontrolleve në terren, policia ka shoqëruar disa mjete të prodhimit të viteve të fundit, për të cilat u kryen verifikime mbi ligjshmërinë e burimeve financiare të përdorura për blerjen e tyre. Nga hetimet paraprake dhe deklarimet e marra, rezultoi se për 3 automjete luksoze nuk kishte dokumentacion që të justifikonte vlerën e tyre me të ardhura të ligjshme. Në këto kushte, mjetet janë sekuestruar në cilësinë e provës materiale. Për rrjedhojë, tre poseduesit e tyre janë proceduar në gjendje të lirë nën akuzën e “Pastrimit të produkteve të veprës penale”. Krahas procedimit penal, policia ka nisur një hetim të thelluar pasuror ndaj pronarëve, me qëllim gjurmimin e burimeve financiare dhe mënyrën e përfitimit të pasurive. Policia e Shtetit bëri të ditur se kontrollet ndaj mjeteve luksoze do të vazhdojnë edhe në ditët në vijim, si pjesë e përpjekjeve për të goditur asetet me prejardhje kriminale.