Dogana e Kosovës, në bashkëpunim me Policinë e Kosovës dhe Drejtorinë Kundër Krimit të Organizuar, ka zhvilluar një operacion kontrolli ndaj një automjeti në pikëkalimin kufitar Qafë Prush, në dalje drejt Shqipërisë, më 3 shkurt 2026.
Gjatë kontrollit të detajuar, zyrtarët kanë konstatuar praninë e një arme zjarri pa numër serik, e fshehur në pjesën e brendshme të automjetit.
Po ashtu, janë gjetur dhe sekuestruar rreth 120 copë municion i kalibrave të ndryshëm, si dhe një shumë parash në valutën euro.
Rasti i është dorëzuar Drejtorisë Kundër Krimit të Organizuar për vazhdimin e hetimeve dhe ndërmarrjen e veprimeve të mëtejme procedurale, në përputhje me legjislacionin në fuqi.
Dogana e Kosovës vazhdon zbatimin e masave të shtuara të kontrollit dhe bashkëpunimin ndërinstitucional për parandalimin e veprimtarive të kundërligjshme dhe rritjen e sigurisë kufitare.