Samir Shahini, drejtori i Arsimit në Komunën e Prishtinës, reagoi pas rastit të dhunës së ndodhur më 9 shkurt 2026 në shkollën fillore “Pavarësia”, ku një mësimdhënës rrahu një nxënës.
Në një postim në Facebook, Shahini e dënoi ashpër ngjarjen, duke theksuar se dhuna në shkolla është e papranueshme dhe nuk relativizohet në asnjë rrethanë. Ai deklaroi se institucionet e sigurisë e kanë marrë rastin në trajtim dhe presin veprim të shpejtë e të plotë nga organet e drejtësisë.
Shahini vlerësoi se ky rast nuk është i izoluar, por pasojë drejtpërdrejtë e një dështimi të gjerë institucional. Prej vitesh, sipas tij, shkollat lihen të vetme përballë problemeve të rënda sociale, pa mbështetje reale dhe pa kapacitete minimale për ndërhyrje. Drejtorët e shkollave dhe Drejtoritë Komunale të Arsimit ngarkohen me përgjegjësi që nuk u takojnë dhe tejkalojnë kapacitetet reale.
Ai theksoi mungesën e psikologëve të mjaftueshëm, punëtorëve socialë, mekanizmave mbrojtës dhe mbështetjes institucionale. Mësimdhënësit dhe nxënësit janë të pambrojtur, ndërsa shkolla trajtohet padrejtësisht si institucioni që duhet të përthithë çdo dështim tjetër të shtetit.
Shahini adresoi kritika direkte ndaj Ministrisë së Arsimit, duke e mbajtur përgjegjëse për gjendjen aktuale. Ministria, sipas tij, prodhon udhëzime administrative të shkëputura nga realiteti në terren, të cilat rëndojnë punën e shkollave dhe lënë sistemin të ekspozuar. Kjo nuk është reformë, por shmangie e përgjegjësisë.
Ai kritikoi edhe mediet për sensacionalizimin, gjykimin e menjëhershëm dhe etiketimin e shkollave e mësimdhënësve pa fakte dhe pa kontekst, duke thënë se kjo nuk ndihmon askënd.