Shtetet e Bashkuara të Amerikës dhe Arabia Saudite kanë zyrtarizuar një marrëveshje të re për bashkëpunim në sektorin e energjisë bërthamore civile. Ky zhvillim u konfirmua nga Departamenti Amerikan i Energjisë, i cili e përshkroi paktin si një hap për avancimin e objektivave ekonomike dhe strategjike midis dy vendeve.
Marrëveshja, e cila u nënshkrua nga Sekretari amerikan i Energjisë, Chris Wright, dhe Ministri saudit i Energjisë, Princi Abdulaziz bin Salman, do t'u ofrojë kompanive amerikane qasje në programin bërthamor të mbretërisë saudite. Edhe pse teksti i plotë mbetet i pafublikuar, raportimet nga mediat amerikane sugjerojnë se ajo mund t'i hapë rrugë pasurimit të uraniumit nga ana e Arabisë Saudite në të ardhmen. Ky aspekt ka nxitur diskutime mes ekspertëve për rrezikun e mundshëm të përhapjes bërthamore në rajon.
Autoritetet amerikane theksuan se marrëveshja për bashkëpunim paqim paqësor përfshin gjithashtu një pakt dypalësh për masat mbrojtëse, që shërben si bazë ligjore për një partneritet shumëmiliardësh dollarësh. Nga ana tjetër, qeveria saudite e vlerësoi këtë nismë si zgjerim të bashkëpunimit ekzistues në sektorin e energjisë, duke theksuar se ajo vjen si vazhdimësi e bisedimeve të zhvilluara gjatë vizitës së udhëheqësit saudit në Uashington nëntorin e kaluar.
Përditësime
Administrata e SHBA ka zyrtarizuar sot 'Marrëveshjen 123' me Arabinë Saudite për bashkëpunimin në energjinë bërthamore. Shtëpia e Bardhë e ka dërguar dokumentin në Kongresin amerikan për shqyrtim dhe miratim. Marrëveshja synon parandalimin e përhapjes së armëve bërthamore, ndërsa pritet të nxisë rritjen ekonomike përmes eksportit të teknologjisë dhe krijimit të vendeve të reja të punës në SHBA.