Departamenti Amerikan i Shtetit, përmes ambasadës në Tiranë, ka paralajmëruar qytetarët amerikanë në Shqipëri për një rrezik të shtuar nga gruppet e mbështetura nga Irani. Ky njoftim vjen pas tensioneve aktuale në Lindjen e Mesme. Sipas njoftimit, këto grupe mund të synojnë subjekte të lidhura me Shtetet e Bashkuara, elementë të opozitës iraniane në Shqipëri, si dhe vende publike, përfshirë atraksione turistike, qendra tregtare, hotele, klube nate dhe restorante.
Deputeti i Partisë Socialiste, Blendi Klosi, i ftuar në emisionin “Trialog” në RTSH 1, deklaroi se Shqipëria nuk është e vetme përballë kërcënimeve kibernetike. Ai theksoi se vendi ka përjetuar dy sulme të mëdha nga grupe iraniane: njëri para tre vjetësh, që ka qenë i vështirë, dhe tjetri para pak javësh. Investimet në mbrojtje kanë reduktuar dëmet në sulmin e dytë krahasuar me të parin.
Klosi nënvizoi se anëtarësia në NATO, partneritetet evropiane dhe aleanca me SHBA sigurojnë mbrojtje globale. Ai bëri thirrje për vëmendje të shtuar nga strukturat e sigurisë dhe mbrojtjes, duke e cilësuar njoftimin e ambasadës amerikane si sinjal të rëndësishëm. Megjithatë, ai qetësoi qytetarët se vendi ka kapacitete dhe mbështetje ndërkombëtare për të përballuar këto kërcënime, pa lënë hapësirë për frikë.