Shtetet e Bashkuara të Amerikës kanë zgjatur zyrtarisht më 22 qershor 2026, për një periudhë njëvjeçare, mekanizmin ligjor që u mundëson vendosjen e sanksioneve ndaj personave dhe subjekteve në Ballkanin Perëndimor, në kuadër të masave të gjendjes së jashtëzakonshme. Vendimet për këto kufizime merren nga Zyra për Kontrollin e Pasurive të Huaja (OFAC), e cila operon nën Departamentin amerikan të Thesarit.
Sipas të dhënave deri në fillim të qershorit 2026, në listën e zezë ndodhen gjithsej 131 individë dhe subjekte juridike nga gjashtë shtetet e rajonit. Shpërndarja e sanksioneve sipas vendeve është si më poshtë:
- Serbia: 49 të sanksionuar
- Kosova: 29 të sanksionuar
- Bosnje e Hercegovina: 26 të sanksionuar
- Maqedonia e Veriut: 12 të sanksionuar
- Shqipëria: 8 të sanksionuar
- Mali i Zi: 7 të sanksionuar
Në total, lista përfshin 71 subjekte juridike dhe 60 individë. Sanksionet janë vendosur për shkak të dyshimeve mbi përfshirjen në krimin e organizuar, korrupsionin, trafikimin e narkotikëve, terrorizmin, cenimin e stabilitetit rajonal ose lidhjet me ndikimin e Rusisë.
Në rastin e Kosovës, një pjesë e sanksioneve lidhet me rrjetin e biznesmenit Millan Radojçiq dhe bashkëpunëtorëve të tij, si Zvonko Veselinoviq, të cilët janë përfshirë në listën amerikane për veprimtari të paligjshme. Sanksionet përfshijnë ngrirjen e pasurive, ndalimin e udhëtimit dhe kufizime tregtare, ndërsa subjektet juridike goditen kryesisht përmes "rregullit të 50 për qind", i cili bllokon çdo kompani që është në pronësi të drejtpërdrejtë apo të tërthortë të personave të sanksionuar.