Mark Rutte, Sekretari i Përgjithshëm i NATO-s, deklaroi më 21 janar 2026 në Forumin Ekonomik Botëror në Davos se zgjidhja e vetme për krizën rreth Grenlandës është diplomacia e matur.
Ai deklaroi se po punon në prapaskenë për këtë çështje dhe refuzoi të komentojë synimet e presidentit amerikan Donald Trump për ta marrë nën kontroll ishullin. «Ju siguroj se për këtë çështje po punoj në prapaskenë», tha Rutte gjatë një paneli. Ai përsëriti se nuk do të prononcohet publikisht, pasi «e vetmja mënyrë për ta zgjidhur krizën është diplomacia e menduar mirë».
Rutte është udhëheqësi i vetëm që ka konfirmuar se do të takohet me Trump-in në margjinat e forumit në Davos të Zvicrës. Ai theksoi se Shtetet e Bashkuara mbeten të përkushtuara ndaj aleancës, por Amerikës i nevojitet një Evropë e sigurt dhe një Arktik i sigurt.
Sa i përket Arktikut, Rutte shprehu pajtimin me presidentin amerikan: «Duhet ta mbrojmë Arktikun nga ndikimi rus dhe kinez». Ai kërkoi që mospajtimet për Grenlandën të mos shpërqendrojnë Evropën dhe SHBA-në nga lufta në Ukrainë, e nisur nga Rusia afër katër vjet më parë. «Përqendrimi në Ukrainë duhet të jetë prioriteti ynë kryesor, është thelbësor për sigurinë evropiane dhe të SHBA-së», u shpreh ai.
Trump ka argumentuar se SHBA-së i nevojitet Grenlanda për sigurinë kombëtare kundër Rusisë dhe Kinës. Grenlanda, territor i Danimarkës me rreth 57.000 banorë, nuk është anëtare e pavarur e NATO-s, por mbulohet nga anëtarësimi danez. Një përpjekje për marrjen nën kontroll do të ishte rasti i parë kur një aleat cenon territorin e një shteti tjetër anëtar.