Në Prishtinë, në rrugën Shtjefën Marku, ka ndodhur shembja e një pjese të rrugës. Lulzim Fushtica, drejtor i Sigurisë dhe Emergjencave në Prishtinë, foli në lidhje me ngjarjen.
Ai theksoi se shkaku ende nuk është përcaktuar plotësisht, por dyshohet se ka pasur rrjedhje uji nën rrugë, e cila nuk është parë më parë. Policia ndodhet në vendngjarje dhe janë marrë masa për sigurinë e hapësirës, duke eliminuar rrezikun e mundshëm.
Ekipe të ujësjellësit dhe emergjencave po punojnë në sanimin e zonës. Është ndaluar rryma elektrike dhe do të ndalet furnizimi me ujë, për të shmangur rreziqe të tjera në ditët në vijim.
Pronari i ndërtesës është thirrur në polici për t’u intervistuar. Sipas Fushtica, pritet iniciimi i një procedure për Shkaktim të rrezikut të përgjithshëm. Nesër, inspektorati ndërtimor do të vizitojë vendin e ngjarjes dhe do të ndërmarrë masat e nevojshme.